北海道 旅遊「貼士」

由某留言版轉載．．．

---

第一次去北海道既朋友，記得帶本五吋乘五吋大既白紙簿去「給」印仔，此乃北海道特色之一，上至酒店，旅遊景點，下至中途站既便利店都有得「給」，每個印仔都有當地景點既特色公仔，非常有紀念價值。
天氣又凍又乾燥，皮膚特別乾燥既人記得帶橄欖油潤膚，最欏命係酒店既暖氣，臨訓前響浴缸放一缸暖水，可以保持室內足夠濕度，衣著方面，天蠶衣加羊毛冷衫，可摺式羽絨外套，基本上跟團除左滑雪之外戶外活動唔多，一上車同出入餐廳就有暖氣，焗住要除衫，所以揀摺得埋既羽絨會方便好多，我自己就買 procam fish 既羽絨，貪佢送埋個好薄既有繩袋仔，一入餐廳就摺細入袋掛椅背，上車又可以摺細放上行理架，非常方便，相反見其他團友著 north face 就硬掘掘，成件掛椅背又拖地又易俾人踩污糟，上旅遊車仲鑊，要全程攬住，諗起都覺得煩；玩雪必備防水手套，最好揀薄薄地身已經夠暖，可以問朋友借，再唔係就女人街買廿蚊一對，一樣夠暖又唔入水，女仔貪靚買多對「冷」手襪同「冷」帽帶去，影相都變化多Ｄ又靚Ｄ，如果唔記得帶防水手套去，當地滑雪場都有得賣，一般舊半到兩舊水左右，另外，鞋方面好多人都會忽略左，上滑雪場一定要著防水鞋，例如 timberland 或者 cat 之類既半筒鞋，（一般皮革類鞋並不防沁水）因為玩雪鞋頭Ｄ雪一溶，沁入內籠整濕埋對襪，到時除襪又死唔除襪又死，個種感覺仲正過滿清十大酷刑， 如果係拍緊拖既男女，我就恭喜男方勒，因為你可以感受一下「我的野蠻女友」入面個一幕交換鞋著既浪漫，保証閣下呢個旅程畢生難忘。
換 yen 我鍾意幫趁中環「百年找換店」，首先，佢 yen 存貨夠多 ，換幾多都有，又唔駛手續費，最重要係可以電話問匯價，o岩價錢可以留低聯絡資料（必須），即時預留幾多 yen，到你上到去欏 yen 無論價錢上落都照電話所報一樣，當然佢會覆個電話俾你 check 下個電話號碼堅定流，而且係上晝問價下晝欏 yen，唔留隔夜個隻。
另外仲有Ｄ小小心得同大家分享，上旅遊車記得帶個跟團送既隨身旅行袋（因為爛左都唔駛恨），除左救急藥物外（例如止瀉，發燒頭痛，膠布之類），最好帶副「士啤」隱形眼鏡，以備不時之需；仲有最好去家居用品店買個Ｓ型勾仔（大概三吋高，兩頭圓，五蚊十個果隻），將個旅行袋或者雜物勾響前面椅背，保証唔駛責到腳痺。
今個月二十一號我都跟團去北海道五日，希望大家開開心心過節，返黎唔會同女朋友有「過節」。